உயர்கல்வி வழிகாட்டி

அன்பார்ந்த சிவகங்கை மாவட்ட மாணவச் செல்வங்களே!

பள்ளிப் படிப்பை வெற்றிகரமாக நிறைவு செய்து, உங்கள் வாழ்க்கைப் பயணத்தின் அடுத்த உன்னதமான படியான உயர்கல்விக்குள் அடியெடுத்து வைக்கும் உங்கள் அனைவருக்கும் எனது நெஞ்சம் நிறைந்த நல்வாழ்த்துகளைத் தெரிவித்துக் கொள்கிறேன்.

இன்றைய உலகம் எண்ணற்ற புதிய வாய்ப்புகளும் திறன்களும் நிறைந்த ஒரு விரிந்த களம். மருத்துவம், பொறியியல், வேளாண்மை, சட்டம், அறிவியல் ஆராய்ச்சி, தொழில்முனைவு, அரசுப் பணிகள் மற்றும் பாதுகாப்புப் படைகள் எனப் பல துறைகளில் நீங்கள் தடம் பதிக்க முடியும். பொருளாதாரச் சூழல் அல்லது வழிகாட்டுதல் குறைபாடு எக்காரணத்தைக் கொண்டும் ஒரு மாணவரின் கல்விக் கனவைத் தடுத்துவிடக் கூடாது என்பதே நமது மாவட்டப் பள்ளிக் கல்வித்துறையின் தலையாய நோக்கம்.

அரசு வழங்கும் 7.5% முன்னுரிமை இடஒதுக்கீடு, புதுமைப் பெண் மற்றும் தமிழ்ப் புதல்வன் திட்டங்கள், கல்விக் கட்டண விலக்குகள், கல்வி உதவித்தொகைகள் மற்றும் தேசியக் கல்வி நிறுவனங்களின் சேர்க்கை வாய்ப்புகள் ஆகியவற்றை முழுமையாக அறிந்து விழிப்புணர்வுடன் உங்கள் எதிர்காலத்தைத் திட்டமிடுங்கள்.

விடாமுயற்சியும், சரியான வழிகாட்டுதலும், தளராத உழைப்பும் இருந்தால் நீங்கள் எட்ட முடியாத இலக்கே இல்லை. சிவகங்கை மண்ணின் பெருமையை உலகறியச் செய்யும் வண்ணம் சிறந்த ஆளுமைகளாக நீங்கள் உயர மாவட்டக் கல்வித்துறை என்றும் உங்களுக்குத் துணை நிற்கும். உங்கள் எதிர்காலம் ஒளிமயமாக அமைய வாழ்த்துகிறேன்!